«Կայթ» նվագախումբը հիմնադրվել է 2017 թվականին՝ նպատակ ունենալով նոր մոտեցմամբ ներկայացնել հայկական ավանդական երաժշտությունը։ Կայթը կատարում է ժողովրդական երգեր և մեղեդիներ, որոնք փոխանցվել են բանավոր ավանդույթով և գրառվել 19-րդ, 20-րդ և 21-րդ դարերում։ Նվագախումբը մի շարք հայկական ժողովրդական երգերի առաջին բեմական կատարողն է և ձգտում է ներդնել դրանք ժամանակակից երաժշտական կյանքում։ Երկացանկը ներառում է հարսանեկան, պանդխտության, քնարական և այլ ժանրերի երգեր ու նվագներ՝ ֆոլկ-ֆյուժն գործիքավորմամբ, որում օգտագործվում են ինչպես հայկական, այնպես էլ ժամանակակից միջազգային գործիքներ։